Гэрэг сэтгүүл "The New Yourk Times"-тай хамтран ажиллахаар болжээ

Монголын сэтгүүлийн хөгжилд шинэ салхи татуулж, огт өөр өнгө төрхөөрөө маргаангүй  ялгарч буй “Гэрэг” сэтгүүл таван нас хүрчээ. Энэ хугацаанд тэд цахим мэдээллийн шуурган дунд амьдрах өнөө цагт залуус, тэр дундаа миллениалуудын өвөрмөц сонирхолд нийцсэн чанартай контент үйлдвэрлэж буй Ub.life сайтыг эрхлэн гаргаж “Анлимитэд медиа групп" болон өргөжөөд буй. Таван жилийн ойн хүрээндээ тэдний хийсэн бас нэг шинэ алхам нь АНУ-ын "The New York Times" сонины Монгол дахь хамтрагч болсон явдал байв. 

Анх долоо хоног тутам гарч байсан “Гэрэг” сэтгүүл  жил хагасын өмнөөс сар тутам уншигчдадаа хүрч эхэлсэн. Улирч буй жилийн эхэнд тэд  "The New York Times Licensing Group"-ийн Монгол дахь хамтрагч болсон юм. Ингэснээр зөвхөн “The New York Times” сонин төдийгүй лицензийн группийн харьяанд буй мэдээллийн олон брэндийн контентийг бүхий л хэлбэрээр авах боломжтой болсон байна.

Хамтрагч болох явцдаа гадны хэвлэлүүд ерөнхийдөө Монголын  зах зээлд орж ирэх сонирхолтой байдгийг олж харсан байна.  "The New York Times"-ийнхан Монгол дахь хамтрагч нь хэн байх вэ гэдэг талаар хэдийн судалгаа, эрэл хайгуул хийж сонгожээ. Өнгөрсөн жил Азийн сэтгүүл зүй, Азийн медиа форум зэрэг олон улсын хурлуудад оролцож, харилцаа холбоо тогтоосны дүнд "Гэрэг"  сэтгүүлийг боломжит хамтрагч хэмээн үзэж  сонгосон гэж байна.  

Ингээд эхний хамтарсан дугаараа сэдэвчилж гаргая гэж шийдээд, "The New York Times"-ийн тэр олон брэнд контентуудыг тодорхой бүтэц, зохион байгуулалттайгаар гаргахаар судалсан байна. “Гэрэг - NYT” хамтарсан дугаараа улиралд нэг удаа бэлтгэхээр болж, хавар “Women today”,  “Адал явдалч, амьд, адармаат Улаанбаатар”-аа гаргасан юм.