Хүүхдүүд өөрсдийн гараар маск оёж, маскжуулах аянд нэгдлээ

Өнөөдрийн байдлаар 200 гаруй улсад амьсгалын замаар тархаж, олон мянган хүний амь нас  дээсэн дөрөөн дээр дэнжгэнэж буй мэдээ дэлхий нийтийг сэртхийлгээд байгаа билээ. Цар тахал хэмээн нэрийдсэн Корона вирусын халдварын  эсрэг хүн бүхэн л эрвийх дэрвийхээрээ сэргийлж байна.

2 сар гаруй хугацаанд хүүхдүүдийн хичээл сургууль орохгүй хөл хорио тогтоосон хэдий ч хүүхдүүд ч гэсэн зүгээр суусангүй.  Найзууд хамтран өөрсдийн гараар амны хаалт оёж ОБГ болон Энэрэл төвд хандивлаж байна. Энэхүү сайн үйлсийг санаачилж буй хүүхдүүд бол Орхон - Эмпати сургуулийн 11А ангийн сурагч  О. Хүслэн, Ж. Түмэн-Өлзий нар юм.  Тэд 150 ш амны хаалтыг хоёулахнаа 10 хоногийн туршид оёжээ.

Өөрсдийн сэтгэл шингээж оёсон амны хаалтыг  ОБГ-т 100ш, үлдсэнийг нь  Энэрэл асрамжийн төвд гардуулан өглөө. Амны хаалт хийгээд зогсохгүй цаашдаа байгаль орчноо цэвэрлэх, тоглоомын талбай дээр ажиллах гээд олон ажлуудыг хийхээр төлөвлөсөн бөгөөд  үе тэнгийнхнийгээ нэгдэхийг уриалж байлаа.

Шавилхан биедээ баймгүй хүсэл тэмүүлэлтэй, хэрсүү ухаан , хэлэх үг нь хурц тэдний минь ирээдүй нь гэрэл гэгээгээр дүүрэн байг. 

Д. Одгэрэл