Оюутолгой компанийн ажилтан ажлын байрандаа нас баржээ

Оюутолгой компанийн ажилтан ажлын байрандаа учир битүүлгээр нас барсан хэрэг гарчээ. Тодруулбал, энэ сарын 19-ний өдөр жолооч 42 настай М нь өрөөндөө нас барсан байсныг хамт амьдардаг өөр нэг ажилтан олсон байна. Талийгаач өрөөндөө хоёулаа байрладаг бөгөөд хамт амьдардаг ажилтан нь 19-ний өдрийн 11.00 цагийн үед ажилдаа гарахад М нь унтаад үлдсэн, 21.00 цагийн үед ажлаа тараад, эргэн ирэхэд М нь өглөө үлдсэн байдлаараа байсан учир дуудахад аль хэдийн нас барж, бие нь хөрсөн байжээ. Ингээд 21.00 цагийн орчимд дуудлага өгсөн байна.

Талийгаач М нь Оюутолгой компанийн туслан гүйцэтгэгч "Ханбогд Хурд" ХХК-д сүүлийн дөрвөн жилийн турш ажиллаж байгаа, гурван хүүхдийн аав ажээ.  

Эх сурвалжийн мэдээллээр, Оюутолгойн ажилтнууд 28/14 гэсэн хувиараар ажиллаж, амрах ёстой боловч талийгаач М нь амралтын 14 хоногтоо бүрэн амарч чадаагүй, дуудагдан ирсэн байна. Тодруулбал, амралтын 10 дахь хоног дээр нь Оюутолгой компаниас дуудаж ажиллуулж байжээ. 

Цар тахалтай холбоотойгоор уурхайн ажилчдын ажлын өдөр уртсаж, хуваарь алдагдах тохиолдлууд гарч байгааг уурхайчид ярьсаар байгаа. Тэдний мэдээлж буйгаар хамгийн олон хоногоор ажилласан ажилтан 70-95 хүртэл хоног ажилласан тохиолдол байгаа гэлээ.

Би энэ талаар Ханбогд Хурд ХХК-иас тодруулахад "Манай жолооч М нас барсан хэрэг гарсан нь үнэн. Тэрээр ажлын 28 хоногийнхоо 21 дэх хоногт нас барсан. Амиа алдсан шалтгааныг тодруулах шинжилгээ хийгдэж байгаа байх, хариу нь гараагүй. Цар тахалтай холбоотой УОК-ын шийдвэр тодорхой гарахгүй байсан зэрэг шалтгаанаар амралтын 14 хоногийг нь бүрэн эдлүүлж чадалгүй, амралт нь дуусахаас дөрөв хоногийн өмнө Оюутолгойгоос дуудсан асуудал гарсан нь үнэн. Гэхдээ ганцхан талийгаач М-ийг биш, бүх ажилтнуудыг дуудсан" гэдэг мэдээлэл өглөө. 

Эх сурвалж: Цахиур.мн